Nuna charra que dio n’Uviéu’l que foi Direutor Xeneral de Carreteres del Ministeriu de Fomentu (güei ocupa’l mesmu cargu n’Alministración del Principáu d’Asturies) a entrugues míes sobro la Ronda, contestóme que’l Ministeriu tien por peracabao tolo tocante a los tráficos Norte-Sur y Este-Oeste n’Uviéu, polo que nun hai nengún plan pa tala obra. Tamién dixo que pa iguar los problemes de tráficu que quieren iguase cola Ronda sedría abondo una vía de carauterístiques paecíes a les de la cai Xeneral Elorza.
N’El Comercio del sábadu, 23 de payares, el Direutor Xeneral de Carreteres d’anguañu, nunes declaraciones, dexó perclaro que’l presupuestu del Ministeriu nun taba p’alegríes «dadas las ajustadas disponibilidades presupuestarias». Y la obra barata nun ye.
Asina que, la Ronda nun ye d’interés xeneral (ye pa iguar un problema de tráficu urbanu); el Ministeriu tien por resueltos los exes de comunicación per carretera n’Uviéu y, por si esto fuera poco, los presupuestos son escasos. Si les coses son asina, ¿por qué siguen p’alantre los estudios? Calletro que porque la llei obliga a finar los procedimientos. Pero nun sedría nin sedrá’l primer estudiu qu’acaba escaecíu nos armarios del Ministeriu.
Por too esto, calletro que la Ronda nun tien nengún futuru, lo que nun quita pa qu’esixamos a Unidas Podemos-P$o€ que s’escaezan d’ella pa siempres, anque’l diputáu de FORO vuelva a pidila pa consiguir el so votu na investidura o pal preste de los Presupuestos, como fizo con Rajoy. Arriendes, hai que tar enfrente del capital demientres siga aneciando na so necesidá. Poro, siguiremos vixilantes.
José María Estrada Janariz