La llegada de PP y C’s al gobiernu d’Uviéu ta dexando una büelga de recortes en toles iniciatives que nun encaxen nel estrechu y esclusivu marcu del “Oviedín del alma”. El Festival Otero Brutal Fest yá quedó ensin 30.000 euros de subvención; la Cometcon cuela de la ciudá tres que-y asignaren cero euros; la Muestra de Folclore Ciudad de Oviedo pierde 15.000 euros; la programación teatral esfumóse esta seronda; l’Academia de la Llingua queda ensin l’ayuda de 24.000 euros, y desaparez la plaza de Coordinador en Llingua Asturiana prevista na Ufierta Pública d’Empléu. Mentanto, estes navidaes Metrópoli aterriza n’Uviéu dende Xixón, col oxetivu puestu en facer caxa nel espaciu públicu a precios poco populares, depués d’una tramitación esprés del bipartitu.
Ello ye que la conceyala de Somos Uviéu Anabel Santiago, responsable ente otres cuestiones de los asuntos de Cultura, tien xera enforma nesti mandatu, pero tamién enerxía abondo pa sacalo alantre y conocimientu de primera mano del mundu artísticu y cultural.
Santiago vien del mundu de la música y foi una de les pioneres na renovación de la tonada asturiana. Tamién ye maestra na Escuela de Música d’Uviéu y agora dedícase mañana y tarde a los asuntos municipales. Dacuando, en reuniones y alcuentros con asociaciones, píden-y qu’eche un cantar. Y arranca a cantar, que lo cortés nun quita lo valiente. Con too, últimamente lo que meyor.